ភ្នំពេញ៖គិតត្រឹមឆមាសទី១ ឆ្នាំ២០២២នេះ ឥណទានផ្ដល់លើការទិញផ្ទះ និងអចលនទ្រព្យកើនឡើងរហូតដល់ ៧ពាន់លានដុល្លារ បើធៀបនឹងរយៈពេលដូចគ្នា ឆ្នាំ២០២១មានត្រឹម៦.៤ពាន់លានដុល្លារប៉ុណ្ណោះ។នេះបើយោងតាមរបាយការណ៍របស់ការិយាល័យឥណទានកម្ពុជា (CBC) ។
របាយការណ៍បានបង្ហាញថា គ្រឹះស្ថានធនាគារភាគច្រើនបានផ្ដល់កម្ចីទៅលើការទិញផ្ទះក្នុងអត្រាការប្រាក់ ៧.៥ភាគរយក្នុងមួយឆ្នាំ ចំពោះទ្រព្យធានាជាអចលនទ្រព្យប្លង់រឹង និងអត្រាការប្រាក់ក្នុងរង្វង់ ១០ភាគរយក្នុងមួយឆ្នាំ ចំពោះអចលនទ្រព្យប្លង់ទន់។
លោក ច្រឹក សុខនីម ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជាបានឱ្យដឹងថា៖ការកើនឡើងនៃឥណ ទានផ្ដល់លើការទិញផ្ទះនិងអចលនទ្រព្យជាសញ្ញាល្អបង្ហាញពីភាពរឹងមាំក្នុងវិស័យអចលនទ្រព្យ ព្រោះធនាគារនៅតែបន្ដនូវភាពទុកចិត្តលើវិស័យនេះ និងជាយន្ដការពង្រឹង គាំទ្រលើវិស័យអចលនទ្រព្យឲ្យទទួលបានភាពជោគជ័យនាពេលអនាគត។
លោកឧកញ៉ាបណ្ឌិត គីម ហ៊ាង ប្រធាន KW Cambodia បានថ្លែងថា៖ការកើនឡើងនៃការផ្ដល់កម្ចីទិញផ្ទះ និងអចលនទ្រព្យនេះបានបង្ហាញពីការរីកចម្រើននៃវិស័យអចលនទ្រព្យទាំងបច្ចុប្បន្ន និងអនាគត ៕ដោយៈសិរីមតី
